Kusinera na sosyal

April 23, 2014

Iloilo City (UPDATE): Babaye nga nadakpan sa drug operation sa Pavia, ginakabig nga watchlisted target personality sang ahensiya sa Bakhaw Mandurriao!

Ginakabig ni Philippine Drug Enforcement Agency ukon PDEA-6 Director Paul Ledesma nga watchlisted target personality sang ahensya sa Bakhaw Mandurriao si Romana dela Cruz sang Cuartero Jaro. Gintudlo ni Ledesma si dela Cruz nga nagtuyo sadtu nga magpugong sa PDEA operatives sang naghimo ang ahensya sang search warrant drug operations sa Bakhaw nga subject si Ana Prevendido-Penicilia, ang ginapahayag ama ni dela cruz. Nagapati ini nga si dela Cruz ang nagbulos sa iya ama matapos nagsaylo sa iban nga lugar. Suno kay Ledesma, nadakpan nila si dela Cruz matapos nakabaton sang impormasyon halin sa PDEA Regional Office-NCR kag PNP Aviation Security Group sa Manila Domestic Airport angut sa ginasuspetsuhan nga package pakadtu sa Iloilo City nga naka-address sa suspek. Nagkagat suno sa iya sa ila transaksyon si dela Cruz sa Pavia sa diin siya nadakpan kahapon. Masobra sa ¼ kilo sang suspected shabu nga nagabalor sang 1.6 million pesos ang nakumpiskar sang pdea kay dela Cruz.

 April 21, 2014

Iloilo City: (Update) Babaye nga Nakuhaan sang Masobra 1/4 Kilo sang Suspected Shabu, Ginakabig sang PDEA-6 nga Right Hand sang Major Drug Personality sa Syudad! 

Ginakabig sang Philippine Drug Enforcement Agency ukon PDEA 6 nga right hand sang major drug personality sa syudad ang babaye nga nakuhaan sang masobra 1/4 kilo sang suspected shabu balor 1.6 milyones pesos sa drugbust operation kahapon. Ginpahayag ni PDEA-6 Director Paul Ledesma nga nagaserbe si Romana Dela Cruz sang Cuartero Jaro nga timbang sa balay ni Hannah Prevendido-Penecilla nga naga-istar na sa Rizal Pala-pala Uno City Proper sa diin barangay kagawad ang iya bana. Gin-ako ni Ledesma nga nabaton nila ang impormasyon sa mudos nga ginasulod sa speaker ang illegal drugs kag ginapadala paagi sa cargo kag carrier services ukon RORO gani ila ginsurveillance tubtob nadakpan si Dela Cruz kahapon.

April 21, 2014

Iloilo: Masobra 1/4 Kilo sang Illegal nga Druga, 

Nakumfiskar sa Drug Bust Operation sa Pavia!

Dakop sa drug bust operation sang Philippine Drug Enforcement Agency ukon PDEA-6 ang ginaalegar taga-dala sang illegal nga druga sa syudad kaina sang hapon. Ginkilala ang nadakpan kay Romana Dela Cruz sang Cuartero Jaro. Nadakpan si Dela Cruz matapos ini nagkuha sang ginpadala nga package sa remittance company. Nakumfiskar sa suspek, ang package ang naga-unod sang tatlo ka puntos sang ginasuspetsuhan shabu nga nasunod sa duha ka speakers. Ginabanta sa masobra 1/4 kilo sang illegal nga druga ang narecover sang PDEA. Ginpahayag nga na-detect si Dela Cruz paagi sa informant sang ahensiya sa diin ika-17 na ini ka beses nga ginapadal-an sang suspek nga druga halin sa manila ukon cavite. Ginaalegar nga ginadala sang suspek sa San Isidro Lapaz ang ginapick-up nga package. Magluwas kay Dela Cruz, arestado man ang driver sang gin-okupar sini nga trisikol nga si Ellacar Badilles, 43-anyos sang Bakhaw Mandurriao. Presu na sa karsel sang PDEA-6 ang mga nadakpan kag natalana kasuhan.